У пачатку лістапада ў залах Музея прыватнага калекцыяніравання ў межах «Дзён мастацтва Латвіі ў Віцебску» адкрылася выстава сусветна вядомага латышскага скульптара, медальера і графічнага дызайнера Яніса Струпуліса. Суарганізатарам дадзенага праекта разам з ВДУ імя П.М.Машэрава выступіла Консульства Латвійскай Рэспублікі ў Віцебску.

Дыяпазон творчасці Яніса Струпуліса даволі шырокі: ад медалёў, прысвечаных гарадам Латвіі, сусветна вядомым дзеячам навукі, культуры, мастацтва, знакавым падзеям, да дзяржаўнага герба Латвіі і дызайна сучасных грошай. У 1970-я гады ім была створана выдатная беларуская серыя, у якую ўвайшлі медалі, прысвечаныя Ф. Скарыне, С. Полацкаму, С. Буднаму, В. Цяпінскаму, М. Сматрыцкаму і інш. Некалькі з іх у мінулым годзе Я. Струпуліс перадаў у дар Віцебскаму абласному краязнаўчаму музею.

У дадзенай экспазіцыі. прадстаўлены творы 1976-2016 гг. Безумоўна, на працягу гэтага часу змяняліся творчыя прыярытэты майстра, але, здаецца, нязменным заставалася майстэрства і вытанчаная, лаканічная манера пластычнай мадэліроўкі. Разважаючы пра аўтарскую манеру Яніса Струпуліса ў медальерным мастацтве, напэўна, можна казаць і пра своеасаблівую «аўтарскую рэжысуру» кампазіцыі, і падкрэслены інтэлектуалізм вобразаў.

Яніс Струпуліс нарадзіўся 28 студзеня, 1949 года ў латышскім мястэчку Вецпіебалга (Vecpiebalga). У 1964 годзе скончыў пачатковую школу ў Яўнпіебалгскім краі, а ў 1966 – сярэднюю школу ў Валцы. У 1973 – завяршыў навучанне на скульптурным аддзяленні Латвійскай акадэміі мастацтва. З 1975 па 1985 гадах працаваў сцэнічным дызайнерам на Латвійскім тэлебачанні, мастаком па афармленню інтэр’ераў у Рыжскіх майстэрнях дэкаратыўнага мастацтва. З 1985 – мастак-фрылансер.

З 1971 года прымае ўдзел у выставах, правёў больш за 30 персанальных выстаў у розных краінах свету, у тым ліку ў Беларусі (2014, Музей Янкі Купалы, Мінск). З 1975 года стварыў больш за 770 медалёў. Сярод іх медаль імя вядомай латышскай пісьменніцы і мастачкі Маргарыты Старасце, якая ўручаецца «Фондам Карліса». Я. Струпулісам распрацавана пластычная мадэль (эталон) Дзяржаўнага герба Латвіі (1990). Разам з Гунарсам Лусісам з’яўляецца аўтарам дызайна адноўленых у 1992 годзе манет Латвіі – латаў. Пасля пераходу Латвіі ў 2014 годзе на «евра» Я. Струпуліс з’яўляецца адным з распрацоўшчыкаў дызайна латвійскіх варыянтаў «еўра» манет. Сааўтар дызайну шэрагу калекцыённых манет, якія выпускаў Банк Латвіі, а таксама манет, распрацаваных да 100-годдзя Латвійскай Рэспублікі і прысвечаных яе гістарычным абласцям.

Аўтар памятных мемарыяльных дошак шэрагу вядомых асоб, такіх як Эрнст фон Бергман (2011), Іаган Крыстаф Броцэ (1996), Эрнэст Брасціньш (2007), Хэрбертс Тымерс (2006), Крыстаф Хаберланд (1994) і Аляксандрс Тыпайніс (2006) Рыхард Вагнер (2013), Аскар Строк (2013), У. Высоцкі (2013) і інш.

Сярод узнагарод: Гран-пры на Трыенале медальернага мастацтва краін Балтыі (1995), прэміі на Трыенале медальернага мастацтва ў 1986 і 1989 гадах, залатыя медалі на Х (1992) і XII (1996) Біенале Дантэ, прыз Паула Страдыня (Pauls Stradins Prize) ад імя Музея гісторыі медыцыны і Акадэміі навук Латвіі (1997), прыз Таварыства Дантэ Аліг’еры ў Латвіі (2010), прэмія Я. Райніса Акадэміі навук Латвіі (2013).

У 2009 годзе ўганараваны вышэйшай узнагароды Латвіі – Ордэна Трох зорак. Сябра Саюза мастакоў (1978) і Саюза дызайнераў Латвіі (1994), Прэзідэнт Клуба медальернага мастацтва Латвіі (з 1989), член FIDEM (Fédération Internationale de la Médaille d'Art – міжнароднай федэрацыі медальернага мастацтва) і дэлегат у ёй ад Латвіі, (1993), Ганаровы член Латвійскай акадэміі навук (1994), член Таварыства медальернага мастацтва Германіі (1998). Творы мастака знаходзяцца ў 60 музеях 18 краін свету.

Міхась Цыбульскі, кандыдат мастацтвазнаўства, куратар выставы